Adu.place разам з EU NEIGHBOURS east зладзілі ADU_TALKS — вялікую імпрэзу, дзе прэзентавалі адукацыйныя магчымасці для беларусаў і беларусак. Анлайн і афлайн у ім узялі ўдзел больш за 250 чалавек! Каб не спойлерыць шмат, скажам, што шмат на якіх адукацыйных праграмах чакаюць беларусаў і беларусак, галоўнае – паспяваць шукаць магчымасці і не саромецца падавацца на іх.
Фота: Аліна Мазавец
Не хвалюйся, калі не атрымалася патрапіць: сабралі для цябе ўсе карысныя спасылкі ў адным месцы.
Што такое EU4Youth?
Эрыкас Янкаўскас, менеджар праграмы EU4Youth фазы III па занятасці і прадпрымальніцтву моладзі, Цэнтральнае агенцтва па кіраванні праектамі (CPVA). Фота: Аліна Мазавец
Ініцыятыва заахвочвае моладзь краін Усходняга партнёрства браць удзел у дэмакратычным жыцці. Яна прапаноўвае гранты, тэхнічную дапамогу і стыпендыі. У 2024 годзе беларусам і беларускам будуць дасяжныя гульня ў чат-боце, Курс электроннага навучання прадпрымальніцкім навыкам і крэатыўнаму мысленню. Інструмент самаацэнкі для маладых прадпрымальнікаў даступны ўжо цяпер, але пакуль што толькі на ўкраінскай мове.
З грантаў цяпер можна падацца на Green House for social innovators. Праект мае мэтай умацаваць сацыяльныя прадпрыемствы ў Грузіі, Беларусі і Украіне, які акцэнтаваныя на ўстойлівыя зялёныя і лічбавыя сацыяльныя бізнес-мадэлі, прыцягненне ментараў, інвестараў і міжнародны абмен праграмы.
Што прапаноўвае SALT Support for Advanced Learning and Training?
Доктар Аўдроне Узіэлене, каардынатарка магчымасцяў для акадэмічнай супольнасці праграмы EU4Belarus: Цэнтральнае агенцтва кіравання праектамі Літвы. Фота: Аліна Мазавец
У межах праграмы можна атрымаць студэнцкія стыпендыі, даследчыцкія групавыя гранты, узяць удзел у стажыроўках для выкладчыкаў, а таксама прайсці моўныя курсы. Прама цяпер набіраюць ахвотных на акадэмічныя стыпендыі для беларускіх даследчыкаў, выкладчыкаў і дактарантаў. Апліканты могуць жыць як у Беларусі, так і па-за яе межамі. Стыпендыю могуць даць на:
- супрацоўніцтва з замежнымі калегамі, каб стварыць курс або навучальны план, выкладаць, а таксама праводзіць лекцыі і прэзентацыі;
- правядзенне даследаванняў у пэўнай галіне ў вышэйшай навучальнай установе або даследчым цэнтры, у тым ліку час у бібліятэках і архівах, палявыя даследаванні (збор даных), а таксама міжнароднае супрацоўніцтва для стварэння рэцэнзуемай публікацыі;
- неаплатная стажыроўка з боку ўніверсітэта або даследчага інстытута.
Падаць заяўку можна да 15 снежня.
Таксама можна атрымаць акадэмічныя групавыя гранты на даследаванні па любым навуковым накірунку. Дэдлайн – 22 студзеня 2024 году. З крытэрамі можна азнаёміцца на сайце.
А Social Camp?
Social Camp – адукацыйна-ментарынгавы праект для беларусаў і беларусак, зацікаўленых у развіцці краіны і сувязях з ёй, незалежна ад месца жыхарства. У 2023-2024 гадах яны прапаноўваюць некалькі курсаў:
- “Сторытэлінг: тэорыя і практыка”;
- “Сацыяльны праект: ад ідэі да рэалізацыі”;
- “Сацыяльнае прадпрымальніцтва”;
- “Адвакацыя”;
- “Распакоўваем актывізм”.
Яны кампактныя і зоймуць у вас некалькі гадзін на тыдзень цягам паўтара месяца. Таксама заўсёды можна папрасіць дапамогі ў ментараў і ментарак праекту. Яны даюць парады, як вырашаць грамадска значныя праблемы, рэалізоўваць сацыякультурныя праекты, атрымліваць веды аб спецыфіцы прафесійнага асяроддзя ў новай краіне знаходжання, як пашырыць кантакты ў лакальнай прафесійнай супольнасці і шмат па чым іншым. Важная ўмова – праекты мусяць быць сацыяльнымі.
Акром гэтага, Social Camp экспертна і фінансава падтрымлівае ідэі, якія накіраваныя на развіццё лакальных супольнасцяў. Памер мікрагрантаў – ад 5 да 20 тысяч еўра. Такім чынам, з Social Camp ты можаш прайсці ўвесь шлях: атрымаць веды, кансультацыі ментараў і ментарак, падтрымку, каб рэалізаваць праект.
Цяпер трывае другі навучальны сезон, набор на другі семестр пачынаецца ў снежні 2023 году. Таксама працягваюць прымаць заяўкі на ментарынг. Пра крытэры адбору, форму падачы заявак і шмат што іншае – глядзі на сайце праекту.
Як наконт міждысцыплінарнасці?
Якуб Кубіца, кіраўнік камунікацый Еўрапейскага каледжа ў Наталіне. Фота: Аліна Мазавец
Коледж Еўропы ў Наталіне прапаноўвае поўныя стыпендыі беларусам і беларускам на навучанне ў міждысцыплінарных даследаваннях. Прымаюць людзей з розным досведам і адукацыяй. Падчас вучобы можна падабраць такія курсы і прадметы, якія цікавыя менавіта табе. За апошнія пяць гадоў не было двух студэнтаў з аднолькавай праграмай.
Можна падавацца анлайн бясплатна да 16 студзеня 2024 году. Важна – на суразмоўі трэба хаця б крыху распавесці пра сябе на французскай мове. Нават калі ўзровень мінімальны, цябе могуць прыняць, калі ты падцягнеш яго да навучальнага году. Падрабязнасці – на сайце.
Куды пракласці MOST?
MOST+ – праграма, якая дапамагае ўстанавіць прафесійныя кантакты паміж беларускімі і еўрапейскімі спецыялістамі і спецыялісткамі, а таксама палепшыць узаемаразуменне паміж імі.
Яна падтрымлівае спецыялістаў і спецыялістак, якія працуюць у пэўных прафесійных сектарах: грамадства, культура, бізнес, адукацыя, ахова здароўя, устойлівае развіццё. Можна паехаць на стажыроўку ў краіны ЕС як самастойна, так і групай. Падрабязнасці – тут.
Хто такія Маладыя Еўрапейскія амбасадары?
Усевалад Лагун, амбасадар еўрапейскай моладзі. Фота: Аліна Мазавец
Гэта маладыя людзі з краін Усходняга партнёрства, Еўразвязу і ЗК. Яны будуюць масты паміж краінамі, павышаюць дасведчанасць аб ЕС у краінах УП, распаўсюджваюць веды пра краіны УП у Еўропе.
Таксама маладыя людзі дапамагаюць павысіць грамадзянскую актыўнасць і разам працаваць дзеля лепшай будучыні. Для гэтага рабята ладзяць імпрэзы ўжывую і анлайн. Сярод іх – варкшопы, канферэнцыі, культурныя актыўнасці, нэтворкінг. Як далучыцца да ўсяго гэтага – шукай на сайце.
Зробім SALTO?
Андрэй Паўловіч, намеснік дырэктара Дэпартамента знешніх і міжгаліновых праграм Фонду развіцця сістэмы адукацыі. Фота: Аліна Мазавец
Праграма для моладзі SALTO аб’ядноўвае некалькі магчымасцяў: Erasmus+, European Solidarity Corps, Young people & youth workers, EU, Programme Countries, EaP, Neighbouring Partner Countries. Рэгулярны апдэйт па ўсіх імпрэзах можна знайсці тут. Таксама на сайце дасяжная бібліятэка інструментаў. Варта стварыць профіль, а потым атрымліваць усю інфармацыю адсюль. Агульную інфармацыю пра праекты шукай тут.
Па спасылцы шукай фота з імпрэзы!
Засталіся пытанні пра імпрэзу? Пішы нам у Telegram-бот!
Ліка Юр’ева