Штогадовы інтэграцыйны намётавы летнік-семінар «Круглае возера-2019»: карысны вопыт і новыя ўражанні!
Беларускае моладзевае грамадскае аб’яднанне “Розныя-Роўныя” запрашае маладых людзей ад 18-ці да 35-ці гадоў (у тым ліку і тых, у каго ёсць розныя фізічныя абмежаванні) правесці 10 актыўных, вясёлых, займальных і пазнавальных дзён у летнім інтэграцыйным намётавым лагеры-семінары «Круглае возера-2019». Мэтай лагера з’яўляецца актывізацыя і інтэграцыя моладзі.
Падчас адукацыйнай праграмы лагера-семінара мы разам з вамі пагаворым аб бар’ерах, якія абцяжарваюць ўзаемадзеянне маладых людзей з інваліднасцю і без яе, праверым на сабе як працуе нефармальная адукацыя, раскрыем сакрэты каманднай працы, высветлім чым вобраз чалавека адрозніваецца ад яго іміджу і як вобраз ўплывае на якасць нашага жыцця. Пагаворым пра тое, хто мае патрэбу ў дапамозе і хто павінен ці можа яе аказваць. Разбярэмся навошта і каму трэба быць актыўным для стварэння інклюзіўнага грамадства. У адукацыйнай праграме лагера: групавыя навучальныя заняткі, дыскусіі, ролевыя гульні, сімуляцыі, форум-тэатр і многае іншае.
Лагер «Круглае возера» пройдзе з 3 па 13 жніўня 2019 года, на беразе возера ў адным з маляўнічых месцаў Беларусі. Дастаўку удзельнікаў з Мінска да месца правядзення мерапрыемства, а таксама харчаванне і пражыванне забяспечваюць арганізатары лагера.
Жадаючым прыняць удзел у намётавым лагеры-семінары «Круглае возера-2019» неабходна азнаёміцца з правіламі ўдзелу і запоўніць анлайн анкету-заяўку не пазней за 19 ЛІПЕНЯ 2019 года.
Знайсці падрабязную інфармацыя пра лагер-семінар, а таксама азнаёміцца з правіламі ўдзелу можна тут.
Мабільны тэлефон для даведак: 8029-555-68-38 (МТС).