Беларускі нацыянальны тэхнічны ўніверсітэт — лідар інжынернай адукацыі ў Беларусі. У ВНУ навучаецца каля 30 тысяч студэнтаў і студэнтак, а з пачатку заснавання ўніверсітэт выпусціў больш за 200 тысяч спецыялістаў і спецыялістак. Геаграфія міжнароднага супрацоўніцтва ўключае больш за 30 краін свету. У БНТУ функцыянуе першы ў свеце Інстытут Канфуцыя па навуцы і тэхніцы.
У межах універсітэта існуе сучасная лабараторыя 3D-мадэлявання, прататыпіравання і вытворчасці неабходных дэталяў FABLAB, а таксама індустрыяльная пляцоўка для вытворчасці інавацыйнай прадукцыі ў прамысловых маштабах.
На сайце ўніверсітэта размешчаны віртуальны 3D-тур па будынках ВНУ.
Паступленне і навучанне
БНТУ прапаноўвае навучанне па 49 спецыяльнасцях бакалаўрыяту і 18 спецыяльнасцях магістратуры на 17 факультэтах, сярэднюю спецыяльную і прафесійна-тэхнічную адукацыю ў 9 каледжах, а таксама навуковую адукацыю ў аспірантуры і дактарантуры. На базе ўніверсітэта магчыма платна прайсці курсы англійскай і кітайскай моў.
Для навучэнак і навучэнцаў школ універсітэт праводзіць падрыхтоўчыя курсы па ЦТ і ўступных іспытах, школу юных архітэктараў і дызайнераў, летнія школы і прафарыентацыйную дыягностыку.
Спіс неабходных для паступлення дакументаў уключае арыгінал школьнага атэстата ці дыплома каледжа, характарыстыку, арыгіналы сертыфікатаў ЦТ ці ЦЭ, медыцынскую даведку, заяву, пашпарт і чатыры фатаграфіі.
Падрабязнасці па факультэтах, спецыяльнасцях і дакументах глядзі па спасылцы.
Фінансавыя ўмовы
Як і ў іншых універсітэтах Беларусі, залічэнне на бюджэт залежыць ад колькасці выдаткаваных месцаў і балаў, якія абітурыенты і абітурыенткі набралі на цэнтралізаваных экзаменах і тэстах.
На платных умовах кошт адукацыі залежыць ад факультэта і курса і складае ў сярэднім 5 300 беларускіх рублёў для грамадзян і грамадзянак Беларусі на першым курсе дзённай формы адукацыі і 1900 беларускіх рублёў — завочнай формы адукацыі.
Тыя студэнты і студэнткі, што навучаюцца на бюджэце і маюць добрую паспяховасць, паказваюць поспехі ў вучэбнай, навуковай і грамадзянскай дзейнасці, могуць разлічваць на атрыманне стыпендыі. У залежнасці ад спецыяльнасці і сярэдняга балу, дадаецца падвышальны каэфіцыент. Памер мінімальнай стыпендыі залежыць ад дзяржаўнага бюджэту пражытковага мінімуму і складае каля 150 рублёў на бакалаўрыяце і 230 рублёў на магістратуры.
Пражыванне
18 студэнцкіх інтэрнатаў цалкам забяспечваюць іншагародніх першакурснікаў і першакурсніц месцамі. Для засялення трэба падаць заяву і запоўніць анкету і падрыхтаваць неабходныя даведкі і дакументы. Тут можна праглядзець інфармацыю пра кожны інтэрнат і абраць той, які найбольш падабаецца, а тут — пачытаць пра засяленне і інтэрнаты.
Сачыце за БНТУ ў ВКонтакте, Instagram, Linkedin.
Ты ведаеш кагосьці, хто вучыўся ці цяпер вучыцца ў БНТУ? Калі ласка, напішы нам на пошту adukacyja@gmail.com і дапамажы звязацца з гэтым чалавекам, каб мы маглі расказаць пра яго ці яе досвед вучобы там.
Калі ты рыхтуешся да паступлення ці цяпер вучышся ў любым ВНУ, дадавайся ў наш утульны чат беларускіх студэнтаў і студэнтак! Там мы збіраемся, каб знаёміцца, дзяліцца досведам і падтрымліваць адзін аднаго.
Каб далучыцца, напішы нам праз Telegram-бота.